رواية النصيب الفصل الخامس عشر 15 بقلم رحاب القاضي

 رواية النصيب الفصل الخامس عشر 15 بقلم رحاب القاضي

#النصيب

_الحلقه الـ 15 

ـــــــــــــــــــــــــــــــ

لعينيكِ سامحتُ هذا الزمانَ 

وكنتُ عليهِ طويلَ العتبْ

غريبٌ علىٰ الدهرِ حُسنُكِ هذا 

فديتِ ولا حُسنَ إلا أغترب 

ولم أكتبِ الشعرَ فيكِ ولكن 

أحبَّكِ منْ نفسهِ فانكتب

ــــــــــــــــــــــــــــــــ

_وقبل الفجر بدقايق في القريه اللي انتقلو ليها اهل شهد، وفي بيت عمها الحج عزمي، كانت شهد نايمه بفستانها الابيض وحجابها علي سرير بسيط في اوضه بسيطه جدا هنا.. 

_فتحت عيونها بتعب وزغلله وسمعت صوت بكاء قريب منها، قامت بسرعه وبصت حواليها لقيت فاطمه قاعده علي طرف السرير وبتبكي بطريقه هيستريه واول ما شافت شهد قعدت قالتلها بلوم.. 

فاطمه 

ليه عملتي كده يا شهد، ليه عملتي في نفسك وفيكي كده يا بنتي ليه بس؟. 

_شهد بصت حواليها ودموعها نزلت وقالت بخوف شديد وهي بتقوم من جنب فاطمه.. 

شهد 

انا ما عملتش حاجه، انا ما عملتش حاجه والله.  

فاطمه بلوم 

كنتي سمعتي كلام ابوكي ورجعتي لسعيد كان زمانك متستته في بيتك دلوقتي.. 

زاد بكاء شهد وقالت بخوف

انتو هترجعوني لسعيد وامه تاني؟.. 

فاطمه بحزن 

ياريت كان ينفع اهو كان هيبقي اهون من اللي هيعملو فيكي ابوكي وعمك.. 

شهد مسكت ايدها وقالت ببكاء مرير

ابوس ايدك يا ماما ما تخليهوش يعمل فيا حاجه، انا والله خوفت من ام سعيد وهربت انتي ما شوفتيش هي عملت فيا ايه، ابوس ايدك ما تخليهوش يعمل فيا حاجه.. 

ـ في الوقت ده دخل صابر ومعاه علي ابن اخوه وعمها عزمي اللي قال بحده.. 

عزمي

فاطمه روحي اقعدي عند عيالك.. 

_فاطمه وقفت قدام شهد اللي خوفها زاد اضعاف من هيئتهم الغاضبه وقالت بحده.. 

فاطمه 

هتعملو ايه في بتي يا حج عزمي، ما هي خلاص رجعت وصاخ سليم سيبوها في حالها بقي... 

صابر بغضب

رجعت قصدك جايبينها غصب، زمان حماتك فضحتنا في الحته وقالت انك هربتي وروحتي بيت ناس اكابر وبتلعبي علي الرجاله اللي هناك يا قليلة التربيه.. 

شهد بصدمه ردت عليه وقالت

والله العظيم ما حصل الكلام ده.. 

عزمي بغضب

اخرسي يا بت انتي ليكي عين تتكلمي كمان بعد ما خليتي سمعتنا علي كل لسان ودلوقتي هتدفعي التمن وتتربي من اول وجديد مدام ابوكي وامك ما عرفوش يربوكي.. 

فاطمه بدموع وخوف

ما حدش ليه دعوه ببتي ما حدش هيقرب منها.. 

عزمي بغضب

صابر ابعد مرتك عن البت خلي ولد عمها يربيها.. 

_بصت شهد بخوف لعلي اللي كان ماسك في تيده "كرباج"، اتخشبت مكانها برعب وصابر مسك فاطمه واخدها بره الاوضه غصب عنها وهي بتقوله برجاء وخوف.. 

فاطمه 

ابوس ايدك يا صابر ما تخلهمش يعملو حاجه في البت ابوس علي رجلك يا صابر ابن اخوك مالوش ضرب عليها.. 

_قبل ما يرد عليها صابر سمعت صوت صراخ شهد اللي كله ألم بسبب عنف ابن عمها وقسوة ابوها وعمها، حاولت فاطمه تخلي صابر يسيبها بس كان واقف جامد وهادي جداً وكأنه مستمتع بعذاب بنته... 

ــــــــــ #بقلم_الكاتبه_رحاب_القاضي ــــــــ

_وفي عربية أسر كان سايق العربيه بهدوء غصب عنه بسبب الطريق الزراعي المتهالك اللي ماشي فيه، وبص اكرم اللي قاعد جنبيه لرحمه اللي نامت وهي سانده براسها علي الشبااك جنبيها وقال لأسر.. 

اكرم

احنا قدامنا كتير ونوصل، وما فيش طريق غير دي؟.. 

أسر بجمود

اكيد لو في كنت مشيت منه، بس هانت احنا يعتبر قربنا ندخل البلد.. 

_وفجأه عدي مطب عالي فأتخبطت راس رحمه في الشباااك جامد وصحيت مفزوعه وقالت بخوف.. 

رحمه 

في ايه؟.. 

اكرم 

ده مطب معلش.. 

رحمه بغيظ

معلش ليه ما هو العيب علي الحمار اللي بيسوق مش عارف تسوق بتتنيل ليه؟... 

أسر بحده 

افضالك بس واعرفك مين هو الحمار.. 

رحمه بحده 

هخاف منك يعني انا، منكم لله ده زمان ماما بتخطط في الطريقه اللي هتموتني بيها منكم لله.. 

ما حدش رد عليها وقالت رحمه بقلق

ده صوت اذان الفجر صح؟.. 

أسر وقف بالعربية وقال

احنا كده في البلد نفسها بس البيت فين بقي؟.. 

أكرم

ما فيش حد حتي نسأله، هنأتر نستني للصبح.. 

رحمه 

يا حفيد ابو لهب منك ليه روحو الجامع هتلاقو الناس بتصلي اسألوهم اومال اللي بيأذن ده مين مش اكيد بني ادم... 

أكرم

رحمه معقوله انتي بتفكري زي البني ادمين اهو.. 

رحمه بغيظ 

وبشتم زيهم برضو فلم نفسك عني عشان انا علي اخري منك ومن التلاجه اللي جنبك ده.. 

بصلها أسر بغضب وقال لأكرم

خليك معاها هنا وانا هنزل اسأل علي مكان بيت اهل شهد هنا وجااي.. 

أكرم 

تمام مااشي.. 

مشي أسر ورحمه قالت بغيظ

يارب تطلعلك سيلعوه.. 

أكرم

حرام عليكي ده جااي يدور علي البنت وشكله خايف عليها بجد.. 

رحمه بضيق

وانا كمان خايفه عليها بس انا برضو ليا اهل هينفخوني لما اروح.. 

أكرم

نطمن علي شهد وان شاء الله مش هتحصل حاجه.. 

رحمه 

يارب استرها... 

رجع أسر بعد شويه وركب العربيه وقال

قبلي البلد جنب المدرسه الابتدائي.. 

رحمه

ايوه شهد كانت قالتلي قبل كده انها دخلت المدرسه الابتدائي اللي في البلد هنا اللي جنب بيتهم وكمان قدام بيتهم في ترعه معفنه.. 

بصلها أسر واكرم بغيظ وهي قالت بقلق

في ايه هي الترعه المعفنه تقربلكم ولا ايه.. 

_ابتسم اكرم بهدوء وأسر اتنهد بنفااذ صبر واخد عربيته وراح لبيت اهل شهد.. 

ــــــــــ #بقلم_الكاتبه_رحاب_القاضي ــــــــ

_في بيت الحج عزمي، طلع علي ومعاه عزمي من الاوضه اللي فيها شهد وبص لصابر بجمود وقال.. 

علي

من النهارده يا عمي شهد مسؤله من راجل انا هبقي جوزها وبكره هكتب عليها وهعرف ازاي اخليها تمشي علي عجين ما تلخبطوش.. 

صابر بغضب 

اللي عايز تعمله اعمله فيها.. 

فاطمه ببكاء

حرام عليك يا علي منين عايز تتجوزها ومنين عملت فيها كده، وانت هانت عليك بنتك يا صابر ابن اخوك يعمل فيها اللي عملو ده وانت تفضل ساكت.. 

صابر بحده

انتي تحمدي ربنا اني ما قتلتهاش ولسه سايبها عايشه بعد عملتها السودا اللي عملتها دي.. 

عزمي بغضب

ادخلي شوفي بتك يا فاطمه وفهميها الوضع اللي هتبقي فيه بعد كده، وبدل ما انتي واقفه تبكي اتعلمي ازاي تربيها هي واخواتها عشان اللي عملتو بتك ما يتكررش تاني.. 

_سابتهم فاطمه ودخلت عند شهد اللي كانت قاعده علي الارض وبتعيط بألم شديد وجسمها كله بيتنفض، جريت عليها فاطمه وحضنتها وقالت ببكاء.. 

فاطمه 

يا قلب امك حقك عليا يا شهد، والله ما كنت عايزاهم يعملو فيكي كده... 

_وبصت علي كتفها وضهرها اللي ظاهرين من الفستان اللي اتقطع من ضرب علي ليها وجسمها بقي كله دم وعلامات حمرا.. 

فاطمه بدموع 

قومي معايا يا شهد، غيري هدومك دي واحطلك حاجه علي الجروح دي، انتي ايه اللي ملبسك الفستان ده اصلا؟.. 

بصتلها شهد بدموع وقالت بنبره خائفه

انا مش هينفع اتجوز علي.. 

فاطمه بخوف 

ششش اسكتي خالص انتي عايزاهم يموتوكي.. 

شهد بصوت واطي وبكاء

مش هينفع اتجوز علي عشان انا متجوزه يا ماما... 

لطمت فاطمه علي وشها وقالت

ليه بتعملي فيا كده يا شهد، ليه عايزه توجعي قلبي عليكي انتي عارفه سعيد خطب اخت نعمه مرات اخوه وحياته زي الفل مش كان زمانك مكانها.. 

شهد بحزن 

عمري ما كنت هبقي مكانها ولا مكان نعمه، عشان انا بيكم انتو اقل منهم وام سعيد ما كانتش عمرها هتعاملني زي ما هتعامل نعمه واختها... 

فاطمه بخوف 

متجوزه مين ومتجوزه من امتي، انطقي يا بت؟.. 

شهد ببكاء

من اسبوع وو والمفروض ان امبارح كان فرحي بس كالعاده انا البس الفستان الابيض وافرح شويه وبعد كده اشوف العذاب الوان.. 

فاطمه بخوف 

طيب  هنقول ايه لابوكي وعمك، وجوزك ده فين سابهم ياخدوكي ليه؟... 

_ما ردتش عليها شهد وقلعت حجابها ونامت وهي بتتألم جامد من جسمها واللي حصلها كله، وراحت فاطمه جابت مطهر وقعدت جنبيها وفضلت تعالج علي قد ما تقدر في جروحها.. 

_وبعد شويه وقف أسر بعربيته قدام بيت الحج عزمي عم شهد، ونزلو هما التلاته من العربيه وشاف أسر نفس العربيه اللي اخدو فيها شهد مركونه قدام البيت، فراح بسرعه وخبط علي الباب.. 

وفتحتله بعد شويه فايزه مرات عزمي وقالت 

نعم انت مين وبترزع في الباب كده ليه؟.. 

أسر بجمود

شهد فين؟.. 

بصتلهم فايزه بقلق وقالت

شهد مين؟.. 

ردت عليها رحمه بحده وقالت

انتي هتستهبلي يا وليه انا عرفاكي كويس انتي فايزه ولا فوزيه مرات عمها انا شوفتك في فرح شهد قبل كده.. 

أسر بحده 

هكرر السؤال تاني شهد فين؟.. 

فايزه بقلق

هدخل اندهلكم الحج يجي يرد عليكم... 

ودخلت وقفلت الباب في وشهم واكرم قال بغيظ

ايه قلة الذووق دي؟.. 

رحمه بسخريه

وانت يا عم الاسر الا ما سمعتلك صوت اترفع ولا كسرت الباب ولا الجو اللي بنسمع عنه في الافلام ده، مش فالح غير تشحططنا معاك وبس.. 

بصلها أسر بغضب وسكت واكرم قال بهدوء

ما ينفعش يعمل كده يا رحمه عشان احنا مش في فيلم ولا روايه احنا هنا في الواقع وهو صاحب حق وجاي ياخد مراته فمافيش داعي للتسرع والعصبيه.. 

_اتفتح الباب في الوقت ده تاني وطلع عزمي ومعاه ابنه علي وصابر اللي كان متعصب جدا وقال.. 

صابر

عايزين ايه انتو، وعرفتو طريقنا منين؟.. 

عزمي 

وبعدين معاك يا صابر الجماعه واقفين قدام بيتنا ويعتبر ضيوف في بلدنا.. 

وبص لأسر واكرم وقال

خير يا استاذ منك ليه عايزين مين؟.. 

أسر بجمود

عايز شهد.. 

صابر بحده 

انت بتتكلم ازاي تعرف شهد منين انت؟.. 

عزمي 

تعرف البت منين انت عشان تقول كده؟.. 

رد عليهم أسر بهدوء وقال

مراتي.. 

بص صابر وعزمي لبعض بصدمه وعلي قال بحده 

ازاي الكلام ده، ولو هي مراتك بجد فين القسيمه بتاعت الجواز؟.. 

أسر بهدوء

ساعتين بالكتير وهتكون هنا، فين شهد بقي؟.. 

عزمي بجمود

ما نعرفش هي فين، روح دور علي مراتك في حته تانيه.. 

أسر بحده 

بقولك ايه يا راجل انت انا هاخد مراتي وامشي بالذووق، والا الموضوع هيبقي قانوني وانا عندي اللي يثبت انكم خطفتوها.. 

صابر بحده

بنقولك البت مش عندنا روح شوف بتتكلم عن مين ودور عليها بعيد عننا.. 

قربت منه رحمه وقالت بصوت واطي 

يكونش عملو فيها حاجه وهي مش هنا فعلا؟.. 

_وكان برضو ده نفس تفكير أسر اللي خلاه يخاف عليها اكتر وهو مش متأكد هي عندهم جوه ولا لا، وفي الوقت ده وقفت فاطمه ورا جوزها وشاورت لأسر بعنيها لجوه... 

علي بحده

مستنين ايه اتفضلو من هنا يلاا.. 

أسر بص لاكرم وقال

خليك هنا مع رحمه وانا هجيب مراتي وجااي.. 

_وزق علي وصابر من قدامه ودخل البيت بسرعه ووراه علي وصابر اللي مسكه من دراعه جامد وقال بحده.. 

صابر

شهد بنتي وانا حر فيها.. 

سحب أسر ايده منه وقال بعصبيه 

كنت حر فيها قبل ما تبقي مرات أسر الفيومي.. 

وقال بصوت عالي

شـــــــــــــهد انتي فين يا حبيبتي.. 

وقف علي قدامه وقال بحده

اطلع من هنا بالذوق والا هتصل بالشرطه واقول انك بتتهجم علينا.. 

أسر ببرود

اشطا يلا كلم الشرطه ونشوف مين فينا صاحب حق.. 

_في الوقت ده في اوضة شهد دخلت عندها ملك اختها وقالت بخوف وهي بتصحيها.  

ملك 

شهد يا شهد اصحي بيتخانقو عليكي بره.. 

قامت شهد وهي ماسكه كتفها بألم وقالت

في ايه يا ملك مين بيتخانق.. 

ملك 

واحد حلو اووي بيقول انه جوزك وبيتخانق مع بابا وعلي.. 

شهد بعدم تصديق

معقوله أسر جه هنا؟!... 

_وقامت ببطئ بسبب الم جسمها واخدت حجابها وطلعت بره الاوضه ولقيت أسر واقف فعلا بيتخانق مع ابوها وعلي ابن عمها... 

_اتملت عيونها دموع كـطفل صغير فقد والدته ووجدها للتو، وقالت بصوت حزين.. 

شهد 

أسر... 

_بصلها بلهفه وخوف حقيقي باين عليه، واول ما شافها قدامه ابتسم بهدوء وقرب منها وقال بهدوء.. 

أسر

انتي كويسه، حد عملك حاجه؟.. 

نزلت دموعها وقبل ما ترد عليه قالت ملك اختها

ايوه علي ضربها.. 

صابر بحده 

اخرسي يا بت، فاطمه خدي بناتك واقعدي جوه لحد. ما نشوف المصيبه اللي نزلت علينا دي... 

عزمي بضيق

بقولك ايه يا جدع انت الحركات اللي انت بتعملها دي ما تنفعش معانا، ليك حق يبقي نقعد ونتكلم بالاصول.. 

مسك أسر ايد شهد ووقف قدامها وقال بسخريه

هي مش شهد مش هنا يا حج، مش عيب تبقي راجل كبير وكداب وكمان جاي تتكلم علي الاصول.. 

صابر بحده 

بتي مش هتمشي من هنا، وانت خد اللي معاك دول وامشي من هنا.. 

مسكت شهد فيه اكتر وقالت بخوف

ما تسبنيش هنا.. 

أسر بجمود

بصو هو بالذوق بالعافيه انا هاخد. مراتي وامشي واظن الفرق بيني وبينكم كبير يعني لو دخلنا مع بعض في سكة مشاكل انتو التلاته كده هتروحو ورا عين الشمس.. 

صابر بغضب

هو ده يا شهد اللي اطلقتي من جوزك وهربتي منه عشانه، هو ده اللي خلتيني احط راسي في الطين عشانه.. 

عزمي بحده 

مش وقته الكلام ده يا صابر، وانت عايز تاخدها وتمشي يبقي نعمل زي ما الاصول بتقول تثبت الاول انها مرتك وزي ما جبناها منك يوم فرحها يبقي تاخدها من هنا بعد ما يتعملكم فرح هنا والبلد كلها تعرف ان بنت صابر اخويا اتجوزت ومش طفشاانه.. 

قربت رحمه من أكرم وقالتله بصوت واطي

ايه جو ذئاب الجبل ده، الحلقه هتخلص امتي؟.. 

أكرم 

تفتكري هما بيتكلمو جد؟.. 

رحمه 

لا طبعا دي عالم واطيه.. 

فايزه بحده

بتقولي ايه يا بت انتي؟.. 

اكرم

هو انتي حد كلمك يا طنط.. 

صابر بحده

ادخلي جوه يا بت انتي، وانت تعالي اقعد خلينا نتكلم.. 

بص أسر لشهد اللي ماسكه في ايده وقال

انتي شايفه ايه؟.. 

شهد ببدموع

مش عارفه.. 

_لاحظ. أسر الفستان اللي كان مقطوع علي كتفها ومدريااه هي بالطرحه، وبحركه خفيفه منه شال الطرحه ووقف قدامها عشان ما حدش يشوفها واتصدم لما شاف الجروح اللي في جسمها وقال بنبره غاضبه... 

أسر

مين اللي عمل كده، ابوكي؟.. 

نزلت دموعها وقالت بحزن 

لا علي ابن عمي.. 

أسر بجمود

طيب ادخلي جوه وما تقلقيش ما حدش هيعملك حاجه... 

وبعد عنها ووقف قدام علي وقال بهدوء

انت بصفتك ايه بتمد ايدك عليها؟.. 

صابر بحده 

ولد عمها وكان بيربيها.. 

أسر بجمود 

وهو خايف يرد ولا ايه؟.. 

رد عليه علي بحده وقال

ايوه انا اللي عملت فيها كده، واقدر اعمل اكتر من كده كمان ولا ايه يا عمي؟.. 

أسر بسخريه

اكرم ده طلع راجل وبيتكلم... 

أكرم بسخريه

بس الراجل ما يمدش ايده علي واحده يا أسر بيه.. 

أسر 

بالظبط الراجل يا علي يضرب راجل زيه.. 

بص علي لابوه وعمه وقال

انت قصدك ايه؟.. 

أسر ببرود

اضربني ولا انت ما بتضربش غير ستات وبس يا اللي بتقول علي نفسك راجل.. 

_اتعصب علي ورفع ايده وكان هيلكم أسر في وشه، بس أسر كان الاسرع ومسك ايده ولواها بحركه قويه لدرجة انها اتكسرت في ايده وذقه علي الارض والتاني بيصرخ من الالم، ابتسمت شهد بهدوء، وعزمي وفوزيه جريو علي ابنهم وصابر مسكه من هدومه وقال بحده.. 

صابر

انت اتجننت بتمد ايدك علينا في بيتنا.. 

نفض أسر ايد صابر بقوه وقاله بغضب

اللي هيفكر يمد ايده عليها اياً كان مين مالوش عندي غير كده، وبنتك ما غلطتش دي اتجوزت علي سنة الله ورسوله.. 

عزمي بحده 

صابر خليهم يترزعو في اي اوضه هنا وروح هات دكتور من الوحده بسرعه لعلي.. 

وقفت رحمه جنب شهد وقالت

انا هقعد مع شهد.. 

فاطمه وهي تكتم سعادتها 

تعالي معايا يا ابني انت والضيف اللي معاك هوريكم الاوضه اللي هتقعدو فيها، وانتي يا شهد اقعدي مع رحمه في اوضتك.. 

_دخلت شهد مع رحمه اوضتها وراح أسر هو واكرم ورا فاطمه اللي دخلتهم اوضه صغيره فيها سرير واحد بس ودولاب وسجاده قديمه شويه مفروشه علي الارض.. 

فاطمه 

معلش الاوضه مش قد المقام بس البيت هنا مش كبير.. 

اكرم 

لا يا طنط دي زي الفل والله، بس فين الحمام؟.. 

فاطمه 

لا هو البيت فيه حمام واحد. بره الاوضه علي الشمال.. 

اكرم 

طيب هستأذن انا بس اروح الحمام.. 

طلع اكرم وفاطمه قالت لأسر بقلق

انت متجوزها بجد ولا بتقول كده وخلاص؟.. 

أسر بهدوء

والله متجوزها بجد وفي حد. هيجيب القسيمه وجاي ورايا كمان ساعتين تلاته هيوصل.. 

فاطمه بدموع

طيب اوعي يخلوك تسيبها وتمشي، مش هيرحموها لو سيبتهالهم، انا ما اعرفش هما ممكن يبعدوك عنها ازاي بس شهد لو قعدت هنا هيدمروها.. 

أسر

هو انتي ليه خايفه اني اسيبها وامشي هو ممكن يحصل ايه؟.. 

فاطمه 

اللي بتطلق هنا بتبقي في نظر الناس مش كويسه وبعد اللي عملته شهد مش هترتاح ابوها وعمها كانو ناوين يجوزوها علي وعلي ده همجي وزي ما انت شوفت عمل فيها ايه قبل ما يتجوزها، انا ايوه زعلانه من بنتي بس قلبي مش هيتحمل اشوفها عايشه حياتها متبهدله هنا ومدفونه بالحيا... 

أسر بهدوء

ما تقلقيش انا مش همشي من هنا غير وشهد معايا.. 

فاطمه 

ربنا يريح قلبك يا ابني، هسيبك تنام بقي وترتاح.. 

أسر

لو حد اتعرض لشهد بأي حاجه ياريت تقوليلي.. 

فاطمه 

حاضر يا ابني بالاذن... 

_طلعت من عنده فاطمه وهو قلع الجزمه بتاعته ونام علي السرير، واول ما افتكر شهد وانها بتتحامي فيه هو من اهلها وانها فعلا في حمايته هو ومسؤله منه هو وبس ابتسم بهدوء وقال.. 

أسر

وبعدين معااااااكي يا شهد وايه اخرة حكايتك معايا.. 

ــــــــــ #بقلم_الكاتبه_رحاب_القاضي ــــــــ

_وفي بيت فتحي ابو نسمه، كان قاعد بيفطر ونسمه امها حطو باقي الفطار وقعدو ياكلو وكانت نسمه مدايقه جدا وقالها فتحي بهدوء.. 

فتحي

قالبه وشك عشان صاحيه بدري يا نسمه ولا في حاجه تانيه؟.. 

ردت عليه ناديه وقالت

غصب عنها تصحي بدري اومال لما تتجوز تفضل نايمه للضهر مش هيبقالها راجل تقوم تفطره وتشوف طلباااته.. 

اتنهدت نسمه بضيق وفتحي قال 

يا ناديه سيبي البت براحتها ولما تبقي تتجوز تتعود براحتها، ان ما اتدلعتش في بيت ابوها هتدلع فين... 

نسمه بدموع

بابا انا مش عايزه سعيد.. 

زعقت فيها ناديه وقالت

وبعدين معاكي علي الصبح، اهو يا فتحي شوف اخرة دلعك فيها.. 

ساب فتحي الاكل وقالها بهدوء

ليه يا نسمه هو عمل حاجه تزعلك؟.. 

نسمه 

هو انت اللي بتسأل يا بابا ما شوفتش اللي حصل امبارح لما جاب امه معاه وهو معزوم عندنا وفضلت ماسكه فيه حتي ما عرفت اتكلم معاه كلمتين علي بعض... 

ناديه 

عادي ما فيهاش حاجه.. 

فتحي

يا بنتي هو احنا مش اتكلمنا في الموضوع ده، بطلي تحطي كلام الناس في دماغك هي امه مزوداهم شويه بس سعيد ما شوفنااش منه حاجه وحشه واعتذرلي وهو ماشي لو كانت امه دايقتنا في حاجه.. 

ناديه بحده 

وبيكلمها البارده من امبارح ومش بترد عليه... 

_قامت نسمه ودخلت اوضتها وهي بتعيط، ومسكت موبيلها لقيت سعيد كلمها اكتر من مره، فقفلت الموبيل خالص ودخلت عندها امها وقالت بهدوء.. 

ناديه 

شويه واجهزي عشان هننزل نجيب الحاجات الناقصه في جهازك يا عروسه ياللي فرحك فاضله اقل من شهر.. 

نسمه بحده 

اموتلك نفسي واريحك مني عشان تسبيني في حالي.. 

زعقت فيها ناديه وقالت

اتلمي يا بت انتي وصوتك ما يعلااش عليا، واعملي زي ما بقولك يلاا.. 

_طلعت من عندها ناديه، ونسمه فضلت تعيط اكتر وهي مش قابله الجواز من سعيد خالص.. 

ــــــــــ #بقلم_الكاتبه_رحاب_القاضي ــــــــ

_وعند شهد كانت قاعده في اوضتها هي ورحمه اللي بتكلم مامتها وبتقولها.. 

رحمه 

خلاص يا ماما بقولك شهد تعبت وكده كده بابا مسافر وانا هرجع قبل ما هو يرجع البيت.. 

عفاف

ماشي يا رحمه بس ترجعي واللي يخليكي تطلعي من البيت تاني، وخلي موبيلك مفتوح لما اكلمك تردي عليا.. 

رحمه 

حاضر يا ماما مع السلامه.. 

قفلت معاها وشهد قالتلها بضيق

حقك عليا يا رحمه انا دخلتك في مشاكل كتير.. 

رحمه

هو الصاحب ليه ايه عند صاحبه غير المرمطه.. 

ابتسمت شهد ورحمه قالتلها بخبث

بس أسر ده طلع بيحبك اووي انتي ما شوفتيش كان خايف عليكي ازاي.. 

شهد بسخريه

خايف الي مصلحته بس للاسف ما فيش غيره يقدر يخلصني من ابويا وعمي واللي عايزين يعملوه فيا.. 

رحمه بعدم فهم 

مصلحه؟! مصلحة ايه دي؟.. 

شهد بدموع 

بالله عليكي يا رحمه انا مش عايزه اتكلم، وبعد كده انتي ولكرم بلاش توقفو حياتكم علي مشاكلي لانها ما بتخلصش.. 

رحمه 

علي فكره اكرم هو اللي حابب يساعدك انا ما قولتلوش يجي، وكمان أسر فاكر ان انا وهو صحاابك.. 

شهد بقلق

هو تفتكري هيحصل ايه يا رحمه، هيخلوني امشي مع أسر ولا لا؟.. 

رحمه 

انتي عايزه ايه؟.. 

شهد 

اكيد طبعا امشي من هنا، انتي شايفه من اول يس ما دخلت هنا عملو فيا ايه؟.. 

رحمه 

يبقي هتمشي وأسر مش هيسيبك شوفتي يا بت يا شهد عمل ايه في ابن عمك.. 

ابتسمت شهد بهدوء وقالت

اهي دي اكتر حاجه عملها من يوم ما شوفته فرحتني... 

رحمه 

هي البت اختك اتأخرت ليه... 

شهد 

انتي بعتيها فين اصلا؟.. 

رحمه 

خليتها تروح تجيبلك علاج للجروح اللي جسمك دي عشان تخف بسرعه.. 

حضنتها شهد وقالت

يا بت انا بموت فيكي والله... 

رحمه بأبتسامه واسعه 

حقك هو احنا لينا غير بعض يا صاحبة عمري ♥

ــــــــــ #بقلم_الكاتبه_رحاب_القاضي ــــــــ

_وفي مول كبير للادوات المنزليه كانت واقفه هناك نسمه مع ناديه بيختارو باقي حاجات جهازها.. 

ناديه 

يا بنتي حرام عليكي اللي عملااه فيا ده، افردي خلقتك دي شويه.. 

نسمه 

لا وانا كده عاجبك ولا امشي.. 

ناديه بغيظ 

ماشي يا نسمه بس نروح البيت، تعالي نشوف ايه اللي ناقص في حاجات المطبخ.. 

نسمه بضيق

شوفي انتي وهاتي اللي عايزاااه انا مش عايزه حاجه.. 

ناديه بحده 

هو انا اللي هتجوز بالحاجات دي ولا انتي ياللي تنشكي، اتعدلي يا بت انتي احسنلك.. 

نسمه قعدت علي كرسي فاضي وقالت

مش شايفه حاجه يا ماما هتروحي تجيبي انتي ولا نمشي.. 

ناديه بغيظ 

ماشي يا نسمه بس نرجع البيت وانا هربيكي من جديد يا بت الجزمه.. 

وابتسمت بخبث وقالت

اهو سعيد جه اتعدلي بقي عشان ما اجبكيش من شعرك.. 

_قامت نسمه بسرعه وبصت وراها لقيت سعيد فعلا جاي ناحيتهم فقالت لناديه بغيظ... 

نسمه 

انتي اللي قولتيله اننا هنا مش كده؟.. 

ناديه 

ايوه واتعدلي احسنلك يا نسمه انتي مش عيله صغيره عشان تدلعي بالطريقه دي علي الراجل اللي قدك معاها تلات اربع عيال.. 

بصت لامها بحزن وجه سعيد وقف قدامهم وقال

ازيك يا ام نعمه عامله ايه؟.. 

ناديه 

الحمد لله يا ابني كويسه، هدخل انا اشوف شوية حاجات جوه وانت خليك واقف مع خطيبتك هنا ما تسيبهاش لوحدها لحد ما اجي.. 

سعيد 

من عينيا حاضر.. 

ودخلت ناديه جوه وقال سعيد بهدوء

حقك عليا ما تزعليش يا نسمه.. 

نسمه بضيق 

هو انت عملت حاجه تزعل... 

سعيد 

ايوه عشان اللي عملته امي امبااارح، بس والله غصب عني انا مش عايز ازعلها ولا عايزك تزعلي مني.. 

نسمه بحده

انت عارف انك امك قاصده تستفزني وتحرق دمي وانت بتساعدها في ده.. 

سعيد بضيق

طيب اعمل ايه هي متعلقه بيا بزياده شويه واكيد مش هيرضيكي اتخانق معاها... 

نسمه بجمود

ما قولتلكش تتخانق معاها بس تبقي في خصوصيه بيني وبينك مش كل حاجه امك داخله فيها دي خدت الورد اللي انت جيبتهولي وهي ماشيه.. 

ابتسم سعيد وقال 

هو انتي زعلانه علي الورد، دلوقتي حالا اجيبلك غيره وكل اللي انتي عايزااه.. 

نسمه بحزن 

مش عايزه حاجه اصلاً.. 

سعيد بهدوء

طيب ما تزعليش وبعد كده اللي بينا امي مش هتعرف حاجه عنه، بس لو حصل واتدخلت في حاجه قوليلها حاضر وانا هعملك اللي انتي عايزااه.. 

نسمه بحده 

هو احنا هنسرق يا سعيد، بقولك ايه امشي انا اصلا مش فاضيه.. 

جات تدخل بس مسك ايدها وقالها بهدوء

انا مش هسيبك يا نسمه وعمري ما هظلمك زي ما انتي فاكره لما نتجوز اني هاجي عليكي بس والله العظيم انا عمري ما هعمل كده تاني... 

سحبت ايدها من ايده وقالت 

وانت بقي ندمان وحاسس بالذنب علي مراتك الاولانيه مش كده؟.. 

سعيد 

هو انتي بتدوري علي اي حاجه تمسكيها عليا غلطه، بس ايوه زعلان من نفسي جدا انها اتظلمت بسببي دي كل الحكايه ومش هخلي اللي حصل فيها يتكرر فيكي.. 

نسمه بجمود 

تبقي بتحلم لو فاكر ان انت او الست امك تقدرو تيجو عليا واسكت يا سعيد، بعد اذنك هشوف امي جوه.. 

_مشيت من قدامه وسابته واقف زعلان، فرجعت وقفت قدامه تاني وقالت بهدوء.. 

نسمه 

بص ما تزعلش انا مش قصدي اغلط فيك يعني.. 

سعيد بهدوء

ولا يهمك اديني اهو بتحمل عشانك باؤيت بقي تتحملي شويه امي عشاني.. 

نسمه 

برضو امك يا سعيد بص ازعل مني انا عايزاااك تزعل مني ده انت هتجلطني.. 

_وسابته ودخلت المحل عند امها وسعيد بصلها بحزن وقال لنفسه.. 

سعيد 

الله يخرب بيتي جيت اكحلها عميتها خالص... 

ــــــــــ #بقلم_الكاتبه_رحاب_القاضي ــــــــ

_وبعد شويه صحي أسر علي صوت موبيله اللي بيرن واول ما فتح عينيه اتصدم من اكرم اللي كان نايم في حضنه.. 

بعد عنه أسر بسرعه وقال

يا عم انت قوووم... 

أكرم 

بس يا كوثر روحي شوفي صلاح يلاا.. 

أسر بغيظ

انا يتقالي كوثر يا ابن ال... 

_ومسك موبيله وطلع في البلكونه اللي في الاوضه وبص للمنظر قدامه بضيق، فكانت قدام ترعه كبيره واراضي زراعيه وبعض المواشي... 

أسر

ايه المنظر ده؟... 

ورن علي فؤاد اللي رد عليه وقال

انت يا زفت بقالي ساعه بكلمك هببت ايه عندك.. 

أسر

قاعد في بيت حمايا ابو شهد نعم؟.. 

فؤاد

طيب مش تطمن اختك عليك وعلي شهد، وبعدين المحامي وصل البلد عندك ومعاه القسيمه بتاعت الجواز.. 

أسر

طيب كويس هو فين بالظبط؟.. 

فؤاد 

الراجل واقف بقاله ساعه في مدخل البلد ابعت حد. يجيبه عندك... 

أسر

طيب خلاص هروحله.. 

فؤاد 

اختك بتقولك هتيجو امتي؟.. 

أسر بجمود

النهارده ان شاء الله، قولها اني كويس وما تقلقش عليا بااي.. 

_قفل معاه أسر ودخل من البلكونه واخد جاكيت بدلته وطلع بره الاوضه وشاف فايزه مرات عزمي ومعاها بنتين تانين قاعدين جنبيها، واول ما شافته قالت بحده.. 

فايزه 

مش تتنحنح قبل ما تطلع ولا هي سويقه قااعد فيها.. 

أسر ببرود

لامؤخذه يا عم الحج ما اخدتش بالي.. 

ضحكو البنات اللي قاعدين جنبيها وقالت هي بغيظ

هي بت صابر هتجيبلنا ايه غير ناس قليلة الربايه زيها.. 

ابتسم أسر ببرود وقال

كويس وعرفتي لوحدك حاجه زي دي من غير ما اقولك عليها.. 

_قبل ما ترد عليه طلعت شهد من اوضتها وهي لابسه عبايه بيتي شبه اللي لابسينها بنات عمها بس لانها اقصر منهم وارفع منهم بكتير شكلها ما كانش حلو عليها خالص وكالعاده لابسه حجابها وقالتله بقلق.. 

شهد 

انت رايح فين؟.. 

أسر بهدوء وصوت واطي

المحامي جاب القسيمه هروح اجيبها منه واجيبه واجي عشان اخلص الموضوع مع ابوكي وعمك، ما تقلقيش مش هسيبك.. 

شهد بجمود

عارفه لان مصلحتك لسه ما خلصتش معايا.. 

ضحك بسخريه وقال 

معاكي حق حتي عشان مصلحتي برضو كسرت ايد ابن عمك اللي اتمدت عليكي... 

اتنهدت بضيق وقالتله

انت هتعمل ايه مع ابويا؟.. 

رجع لورا كام خطوه وبصلها من فوق لتحت وقال

ايه اللي انتي لابسااه ده.. 

شهد بتوتر

دي عباية ماما عشان مش معايا هدوم وو... هو انا بسألك علي ايه وانت بتقول ايه؟.. 

أسر بغيظ

ما تعليش صوتك عليا مش يطلع عيني عشانك وفي الاخر تعلي صوتك عليا.. 

شهد بضيق

ما قولتش لحد يطلع عينه عشاني.. 

أسر وهو بيقلد طريقتها 

أسر خدني معاك متسبنيش هنا، امي اللي قالت كده من شويه صح؟.. 

_بصت للارض بأحراج وهو ابتسم بخبث وقرب منها ومش واخد باله من مرات عمها وبناتها وفاطمه اللي طلعت من المطبخ وهو واقفين بيتفرجو عليهم، وقال بهدوء... 

أسر

بس هو انا لازم اعمل كده واكتر من كده عشانك، لان ده مش مكانك ولا انتي ينفع تفضلي هنا ولا انا ينفع اسيبك لوحدك هنا من غير ما تكوني معايا.. 

فاطمه وهي بتقرب منهم 

الله واكبر ربنا يحميكم ويحرسكم من العين، في ايه يا فايزه واقفه انتي وبناتك للبت وجوزها كده ليه ما تسيبوهم براحتهم.. 

قالت واحده منهم 

احمم لامؤخذه يا جماعه، يلا بينا يا امي من هنا.. 

أسر بخبث وهو بيلف دراعه حاولين شهد وقربها ليه بهدوء وقال

قوليلهم يا طنط مش عارف اتكلم مع مراتي خالص لوحدنا ولا ايه يا شوشو.. 

_بصت شهد لايده اللي علي كتفها بكسوف وتوتر وقالت بصوت واطي... 

شهد 

شيل ايدك طيب... 

أسر

تؤ لما افرس العقربه مرات عمك دي الاول.. 

حاولت هي تبعد فضمها ليه اكتر وقال

رايحه فين بس ما احنا حلوين.. 

شهد بألم من جروح كتفها

كتفي متعور علي فكره وايدك وجعتني.. 

شال ايده بسرعه وقال بهدوء

سوري مش قصدي، هروح اجيب الراجل وجاي ما تقلقيش ما حدش هيقدر يعملك حاجه.. 

وطلع مفتاح عربيته من جيب الجاكيت واداه ليها وقال

خلي الجاكيت معاكي ضمان لحد ما ارجعلك عشان ما تخافيش.. 

شهد 

يعني هو انت هيفرق معاك الجاكيت لو عايز تمشي يعني؟.. 

أسر بخبث

اااه هيفرق انتي عارفه ده بكام ده اسمه الشيخ جاكيت.. 

_ضحكت بهدوء علي مشاغبته ليها وهو مشي وقالت بنت عمها بنبره ساخره.. 

البنت 

وده وقعتي عليه منين  يا بت عمي، شكله زي اللي بيطلعو في التلفزيون.. 

شهد بغيظ

النصيب يا هبه، بعد اذنك.. 

_دخلت شهد اوضتها تاني لقيت رحمه صحيت من نومها وقالتلها بضيق.. 

رحمه

انا جوعت اكليني بسرعه بدل ما افضحكم... 

شهد بقلق

وطي صوتك طيب وهخلي امي تجيبلك اكل، انا خايفه اووي يا رحمه من اللي هيحصل كمان شويه.. 

رحمه بعدم تركيز

ايه اللي هيحصل؟.. 

شهد 

ركزي يا رحمه أسر هيقعد مع عمي وابويا وهيتكلمو علي موضوع جوازي منه.. 

رحمه 

من مين؟.. 

شهد 

نسيت انتي جعانه فمش هتركزي معايا... 

رحمه 

ايوه انا جعانه والله، انا كنت مستنيه اكل في فرحك بس حصل اللي حصل وجوز الارانب اكرم وأسر جابوني هنا علي معده فاضيه... 

ــــــــــــــــــــــــــــــ

_وبعد شويه كان قاعد أسر هو واكرم مع صابر وعزمي لوحدهم وأسر كان حاطط رجل علي رجل وبيشرب سجارته بكل برود كعادته وقال لعزمي بخبث.. 

أسر

قولي يا حج عزمي ابنك دراعه خف؟.  

عزمي بغيظ

بقولك ايه يا جدع انت مالكش دعوه بأبني فاهم ولا لا؟.. 

صابر بضيق

المهم انت عايز ايه؟.. 

رد عليه أسر

القسيمه وانت شوفتها اهوو يعني بنتك مراتي علي سنة الله ورسوله وعايز اخدها وامشي دلوقتي واديني اهو بعمل بأصلي وباخد اذنك. 

صابر بجمود

ما اقدرش اديهالك بعد ما البت طفشت ما اقدرش اخليك تاخدها دلوقتي غير لما الموضوع يتصلح قدام النااس كلها، انا وصلني اللي انت عملته في الحته في مصر لما قولت انها مراتك بس ما فيش حاجه بتستخبي والبلد كلها هنا بتتكلم علي بنتي وانا عايز اقطع لسان الناس كلها.. 

أسر بجديه

والمطلوب ايه؟.. 

بص صابر وعزمي لبعض وعزمي قال

هتكتب عليها من الاول هنا قدام الناس كلها، وهتدفع المهر لابوها كمان.. 

أكرم بعدم فهم 

مهر ايه ما هو متجوزها اصلا ولو الراجل وافق يكتب الكتاب من الاول يبقي كتر خيره وعشان شكلكم قدام الناس.. 

صابر بحده 

اومال هو عايز ياخد البت ببلاش كده.. 

أسر بجمود

بنتك حقها مضمون اقري المؤخر كام كده.. 

عزمي بحده 

مالنااش دعوه بالمؤخر احنا مش ناوين علي طلاق وخرااب احنا بنتكلم في اللي هياخده ابوها في ايده منك حق انك هتتجوز بنته.. 

_بصلهم اكرم بضيق وانهم بيتكلمو عليها كانها سلعه او حاجه بيبعوها، وأسر طفي سجارته قدامهم واتعدل في قعدته وقال بهدوء.. 

أسر

عايزين كام؟.. 

صابر 

مليون جينيه.. 

أسر بنفس هدوءه

موافق بس الحوار كله يخلص النهارده واخدها وامشي.. 

صابر

انا وامها واخواتها هنرجع مصر تاني شهد هتيجي تزور امها واخواتها انت مش هتقطعها مننا.. 

اكرم بسخريه

لا وانت باقي علي بنتك اووي.. 

رد عليه أسر وقاله بهدوء

سيبه براحته المهم نخلص من الحوار ده.. 

وتابع كلامه وهو بيقول لصابر

نص ساعه وهخلي المحامي يجهزلك الشيك بالمبلغ، ولحد ما يجهزه انا هتكلم مع شهد لوحدنا...

عزمي بضيق

لا بعد كتب الكتاب وو.. 

أسر بحده 

جرا ايه يا حج هنكدب ونصدق ولا ايه، شهد مراتي غصب عنكم واقدر اخدها وامشي واقولكم اخبطو دماغكم في ادخن حيطه هنا، بس عشان خاطرها هي عاصر علي نفسي لمونه وساكت... 

قام صابر وقاله 

تعالي هخليك تتكلم معاها لوحدكم.. 

_ 

وطلع صابر ومعاه أسر وراح لاوضة شهد اللي كانت قاعده فيها هي ورحمه ومعاها اخواتها الصغيرين وخبط صابر علي الباب ودخل وقال بجمود... 

صابر

قولي لصحبتك تاخد اخواتك وتطلع بره جوزك عايز يتكلم معاكي لوحدكم... 

_بصت لرحمه بخوف ورحمه قامت بسرعه واخدت اخوات شهد وطلعت بره، وبصت شهد لابوها بنظره كلها حزن وخوف وبادلها هو بنظراته اللي كلها غضب ودخل أسر ووقف جنبيه وقاله.. 

أسر بجمود

في حاجه يا حمايا، بعد اذنك لو سمحت عايزها في حاجه خاصه.. 

_اتنهد صابر بضيق وسابهم وطلع وأسر قفل الباب وشهد قالت بقلق  ..... 

شهد 

في ايه؟.. 

أسر بجمود

ابوكي هيخليني اكتب كتابي عليكي من الاول تاني هنا قدام اهل بلدكم، وعايز مليون جينيه قدرك بالمبلغ ده.. 

نزلت دموعها بعدم تصديق وهو كمل كلامه بجمود وقال

انتي طبعا عارفه اني لو هاخد المبلغ ده من حد هيكون فؤاد، فعشان احميكي منهم هدفع كتير قبل ما اخد. منك اي مصلحه.. 

شهد بحزن قالتله

لو عايز تمشي امشي مش عايزه مساعدتك.. 

أسر 

مش بقولك عشان كده، بس انا بساعدك يا شهد وهستني منك ترديلي المساعده، يعني لو مثلا مشكلتك اتحلت مع اهلك فتقولي لا ضميري والكلام بتاعك ده وهتفكري بس تروحي تقولي لفؤاد حاجه عن اللي بينا اقسم بالله اللي كانو هيعملوه اهلك فيكي ارحم بكتير من اللي انا هعمله، وافتكري اني لو مشيت دلوقتي مش هيحصلك كويس برضو ومش همشي وانا ساكت ده هعميها عليكي خالص... 

شهد بدموع 

في حاجه تاني هتقولها.. 

أسر

ايوه انا علي اتفاقي برضو معاكي بعد ما هنطلق حياتك هتكون تمام وكويسه جدا بعيد عن اهلك وطول فترة جوازنا مش هسيب امك واخواتك خالص يا شهد هضمنلك كمان ان اخواتك ما يتعبوش زيك.. 

شهد بجمود

خلصت.. 

أسر

ايه رئيك هتقرري ايه؟.. 

شهد بسخريه

والله هو انت تهددني وتقولي يا تسمعي كلامي با ادمر حياتك وتقولي اختاري، لا حضرتك بقي اللي نختارلي انا عايزه ايه، هو انا في الحالتين خسرانه بس زي ما بيقولو معاك انت هتبقي خساره بمكسب ومش مكسب ليا انا ده لامي واخواتي عشان لما يوصلو لسني ما يلاقوش حد يزلهم ويبيع ويشتري فيهم زيي كده.. 

قرب منها ومسحلها دموعها بهدوء وقال 

اتفقنا يا شهد... 

_ وسابها وطلع وهي قعدت علي السرير وفضلت تعيط بحزن علي الحاله اللي كل مره بتوصل ليها مع اهلها ومعاه.. 

ــــــــــ #بقلم_الكاتبه_رحاب_القاضي ــــــــ

_وفي بيت الفيومي كان فؤاد قاعد بيتعشي وجنبيه ابنه تيام وهاله قاعده ساكته.. 

فؤاد 

بتقلقي نفسك علي الفاضي انتي يا حبيبتي.. 

هاله 

علي اساس انه فارق معاك يعني.. 

فؤاد بسخريه

معاكي حق هو مش فارق معايا حاجه غير الفراخ والبشاميل اللي عملاهم صباح دول لاني واقع جوع.. 

قامت هاله وشالت الاكل من قدامه وقالت

انت بتغيظني طيب مش هتاكل يا فؤاد غير لما توديني لاخويا دلوقتي... 

ضحك فؤاد وقال

يا بت المجنونه احنا هنروح نعمل ايه واخوكي قالي الصبح هيجي، احنا مش هنستفاد حاجه لو روحنا.. 

هاله بحده 

ما انا كان ممكن اروح لوحدي علي فكره.. 

فؤاد 

عشان يطلع عليكي هناك ديب او عفريت او.. 

قاطعته وقالت بغيظ

طيب اسكت الولد قاعد معانا يا رخممم.. 

تيام 

لا لا عادي انا مش بخاف زيك يا مامي.. 

ضحك فؤاد وقالها

ههههههههه شكلك بقي وحش اووووي.. 

هاله بحزن 

فؤش.. 

فؤاد 

لا مش هنروحلهم.. 

هاله بعصبيه 

عشان انت رخم اصلا ومش هاكل معاك... 

فؤاد 

انتي اللي خسرانه انا اصلا هاكل كل ده لوحدي والمكرونه لو خلصت هتندمي دي اكتر مره صباح تظبطها مع البشاميل... 

تيام 

ولا الفراااخ يا بابي بتدوب كده جوه قلبي.. 

فؤاد بخبث

قولها اللي عايزه تقعد جعانه دي.. 

قامت هاله وقالت بغيظ

هدخل اكل في المطبح لوحدي ومش هاكل معاكم برضو... 

_وسابتهم ودخلت المطبخ وهما ضحكو وسلمو علي بعض وفؤاد قال بحماس.. 

فؤاد

الخطه نجحت وخلنااها تاكل.. 

تيام 

بس مش اكلت معانا.. 

فؤاد بهدوء

المهم انها هتاكل ما ينفعش تبات من غير عشا.. 

تيام

طيب يلا خليني اكلم أسر.. 

فؤاد بغيظ

انا نفسي افهم أسر عاملك ايه انت وامك بتحبو في ايه ده؟.. 

تيام 

هو انت مش بتحب أسر يا بابي؟.. 

فؤاد بابتسامه بسيطه 

لا طبعا بحبه وبحبه جدا ده اخويا الصغير.. 

تيام بصدمه 

يعني انت وماما اخوات.. 

فؤاد 

لا اخوات ايه ما تتغبااش زي امك، كل يا حبيبي وانت ساكت عشان اخليك تكلم أسر... 

ــــــــــ #بقلم_الكاتبه_رحاب_القاضي ــــــــ

_وفي بيت عم شهد كانت قاعده في اوضتها وهي لابسه فستان ابيض بسيط وعيونها الخضرا بقيت مليانه دموع ولون احمر مخيم علي لونهط الطبيعي من كتر بكاها، ودخلت عندها رحمه وقالت.. 

رحمه 

مرات عمك عامله شوية محشي انما ايه حاجه كده اخر جمدان، انتي بتعيطي تاني هو في ايه يا شهد ما الموضوع اتحل اهوو.. 

مسحت شهد دموعها وردت عليها وقالت

ما فيش حاجه بس موقف بابا دايقني.. 

رحمه 

يا ستي عيشي في الدنيا علي اساس انك كائن حلوف وانتي هترتاحي صدقيني.. 

ابتسمت شهد بهدوء وقالت رحمه

ايوه كده اضحكي حتي عشان ما تسديش نفس الراجل اللي جايلك دلوقتي.. 

شهد بقلق

راجل مين؟!.. 

رحمه بغيظ

هيكون ابويا يعني... جوزك يا شهد أسر ياسين زمانه ده.. 

اتنهدت شهد بضيق وقالت

هو انتي هتباتي فين؟.. 

رحمه 

مع امك واخواتك هنتلكلك كده كلنا في اوضه واحده.. 

شهد بتوتر

طيب ما تباتي انتي معايا هنا وملك كمان وهو يبات مع اكرم.. 

رحمه 

لا طبعا ما ينفعش تعرفي الواد اكرم هيبات في اوضه واحده مع ابوكي اول ما ابوكي قال كده الواد وشه قلب اصفر ونزل عليه الصمت الرهيب.. 

شهد بضيق 

يا رحمه عشان خاطري خليكي معايا هنا انا مش عايزه اشوف أسر ده خالص النهارده.. 

رحمه بقلق

شهد هي ايه الحكايه بالظبط؟.. 

شهد بدموع 

ما فيش حاجه خلاص... 

دخلت فاطمه وقالت

شهد مش قاعده ليه بره مع المعازيم.. 

رحمه 

تعبت شويه يا طنط معلش.. 

فاطمه 

علي العموم هما مشيو خلاص يلا بينا احنا يا رحمه  عشان العريس يجي لعروسته... 

_مسكت في ايد رحمه واتملت عيونها دموع تاني وقالت رحمه بصوت واطي ونبره كلها قلق.. 

رحمه 

هي ايه الحكايه يا شهد في ايه، الواد السهون ده غاصبك علي الجواز ولا ده خوف طبيعي ولا في ايه؟.. 

شهد بتوتر

مم ما فيش بس متوتره شويه.. 

رحمه 

يا شيخه خوفتيني اهدي وبعدين الواد واقع لاخره ده عامل ولا اندرتيكر عشانك... 

_قالت كلامها وطلعت هي وفاطمه وشهد فضلت قاعده زي ما هي لحد ما دخل أسر عندها وقفل الباب في الوقت ده اتكررت قدامها لحظة جوازها من سعيد وافتكرت اول ما اتقفل عليهم باب واحد.. 

_فلااااش بااااك

سعيد

بصي يا بنت الناس انا بصراحه كده مكنتش موافق بالجوازه دي وامي هي اللي جابتك ليا فأنتي هنا عايشه برضا امي هتراضيها هتقعدي هتزعليها اللي هتعمله فيكي مش هقدر اقولها حاجه... 

شهد بدموع

انت مكنتش عايز تتجوزني، طيب لي كملت معايا لحد الفرح... 

سعيد

عشان ما اقدرش اقول لامي مش عايزك، واهي جوازه وخلاص مكلفتناش حاجه... 

_رجعت من ذكرياتها السيئه اول ما أسر قعد جنبيها ومرر ايده بهدوء علي كتفها فأتنفضت بخوف وقامت من جنبيه بسرعه وقالت... 

شهد 

انت ايه اللي بتعمله ده؟.. 

أسر بهدوء

العادي يعني.. 

شهد بحده ودموع 

انت بتحلم اللي بيني وبينك الاتفاق اللي بينا وبس.. 

أسر بهدوء 

تمام ما تخافيش تعرفي يا شهد كل حاجه هنا بتحصل عمري في يوم ما توقعت انها تحصل حتي في خيالي، يعني كنت فاكر يوم ما هتجوز هيبقي فرح اسطوري ما اتعملش لحد وتبقي معايا البنت اللي بحبها.. 

_قام وقف قدامها وقال بدموع ونبره تحمل الكثير من الغموض والحزن... 

أسر

بس النصيب خلاها تموت بقي وانا ابقي في يوم فرحي هنا في قريه عمري ما سمعت عنها ومع بنت لو كنت شوفتها من عشر سنين بس كنت هقول الله ايه الطفله الجميله دي، وفوق كل ده بتبصلي بعيونها الخضرا دي وكأني عدوها.. 

شهد بسخريه

انت كده فعلا.. 

أسر بعدم تصديق

بتهزري مش كده؟.. 

_ ما ردتش عليه وراحت اخدت مخده من علي السرير واللحاف وحطتهم علي الارض ونامت بكل هدوء وقالتله.. 

شهد 

ممكن تقفل النور لو سمحت.. 

أسر بسخريه

ايه الاوفر ده، قومي يا شهد بلاش الحركات دي.. 

شهد بحده 

انت عايز مني ايه؟... 

_قعد جنبيها علي الارض ومسكها من دراعها جامد وقال بعصبيه.. 

أسر

هو انتي ليه محملاني ذنب كل حاحه في حياتك هو انا اللي جوزتك جوازه فاشله في الاول انا اللي لما هربتي من اهلك ورحتيلو طلعت ندل معاكي، فوقي يا شهد مافيش حد واقف جنبك غيري وما حدش خلصك من اهلك غيري فبلاش تحطيني في صوره وحشه عندك.. 

نزلت دموعها وقالت بألم 

سيب ايدي وابعد عني... 

ضغط علي ايدها اكتر وقال بغضب

مدام كده كده وحش معاكي فخليني وحش بالمره.. 

_قال كلامه وساب ايدها وشالها بين ايديه رغم مقاومتها ليه وحطها علي السرير وقرب منها وقال بنبره صارمه.. 

أسر

اقلعي الزفت اللي علي راسك ده انا مش غريب  ومش حرام اشوفك من غيره واهدي ونامي ولو رفضتي هتنامي الليله كلها في حضني.. 

_بسرعه قلعت حجابها وحطته جنبيها علي السرير ورفعت اللحاف ونامت بسرعه وهي مغطبه نفسها بالكامل، ابتسم بتلقائيه غصب عنه علي تصرفاتها المسليه بالنسبه ليه، وبكل هدوء قلع جاكيت بدلته والجزمه بتاعته ونام جنبيها وهو مديها ضهره.. 

_شالت هي اللحاف من علي وشها وبصتله بقلق وجات تقوم بس هو قال بحده.. 

أسر

اتخمدي يا شهد احسنلك... 

شهد بخوف 

انا نايمه اصلا من بدري.. 

_تفتكرو بقي هيحصل ايه في الاحدااث اللي جايه؟.. 

ـــــــــــــــــــــــــــــــــــــــــــــــــــ

#بقلم_الكاتبه_رحاب_القاضي

          الفصل السادس عشر من هنا 

لمتابعة باقي الرواية زوروا قناتنا على التليجرام من هنا  

تعديل المقال